L’Ochote Llangreanu constituyóse (como’l so nome indica) en Llangréu, en plenu corazón del valle mineru asturianu de la Cuenca’l Nalón, allá pel mes de payares de 1987. La so fundación respondió a la molición d’un númberu amenorgáu de persones que comparten un  sentimientu bien especial: una gran afición ya ilusión pel apasionante mundu del cantar coral, n’especial en formaciones pequeñes de voces graves, como cuartetos y ochotes, los “coriquinos” tan nomáos n’Asturies y nel restu’l norte d’España. Integren el Grupu persones que, na so mayoría, provienen d’anteriores esperiencies corales.

Cuntando dende’l so entamu cola dirección de Patricia Miriam Martínez Iglesias, alternó los más diversos escenarios. Dende xuntes de profesionales o gremios, a actuaciones en teatros de prestíu reconocíu. Asina, ente otros, l’Ochote Llangreanu sonó en marcos como’l Teatru Rosalía de Castro ( A Coruña), Lópe de Vega ( Sevilla), Campoamor (Uviéu) en repitíes ocasiones ,y compartió escenariu con formaciones tan prestixoses como los norteamericanos Zion Harmonize de Nueva Orleans.

Tamién entama actos rellacionaos col fomentu del Cantar Coral y eventos culturales rellacionaos con esta faceta. Por citar dalgunos d’interés y prestíu: en 1.992 foi’l motor del  III Alcuentru Coral  “Mancomunidá del Valle’l Nalón”, y en 1.999 entamó’l Primer “Alcuentru de Cuartetos y Ochotes”. Que pola so relevancia y la so positiva acoyida, tien continuidá año añu tres d’añu en Llangréu.

Les sos actuaciones son numberoses y, de resultes de los galardones que va atropando, ye riquíu p’actuaciones de prestíu nacional ya internacional. Asina en 1.999, por invitación espresa de la Confederación Coral Española participó nel Certame Nacional d’Ochotes celebráu en Borja (Zaragoza). Darréu, nos años 2.000 y 2008, l’Ochote Llangreanu foi convidáu a participar en Portugalete (Euskadi), nel Festival Internacional d’Ochotes. La experiencia nel País Vascu nun diba repetise hasta 2014, añu nel qu’el Ochote partitipó nel ya tradicional Alcuentru d’Ochotes d’Errentería, dexando bien altu’l llistón de la música coral asturiana nuna tierra, Euskadi, na qu’el cantu coral ye un iconu cultural. Nel añu 2017, l’Ochote cantó nel prestixosu Festival del Cante de les Mines, cellebráu na localidá de La Unión (Murcia)

Nel nomáu Concursu y Amuesa de Folklore “Ciudá d’Uviéu” -toa una referencia cada añu pa la música tradicional asturiana- l’Ochote Llangreanu saldó con ésitos les sos participaciones nes ediciones d’esta modalidá. Asina, nos caberos años collechó dos segundos premios y tres primeros puestos, un palmarés malo d’algamar nun concursu de la categoría del uvieín.

Cruciando les fronteres, en payares de 2002  l’Ochote algamó’l tercer premiu nel Concursu Européu de Cantar Popular celebráu na ciudá italiana de Bolzano. La participación en dichu Concursu tuvo llugar  dempués d’una primer fase onde un xuráu internacional escoyó a la formación llangreana al par de otros diez coros, d’un total de cincuenta y ocho que presentaron la so candidatura. Na semifinal, celebrada’l los díes 21 y 22 de payares de 2002 resultó clasificáu al par d’otros cinco coros, ocupando la cuarta posición; y na final, celebrada a otru día, consiguió’l meritoriu tercer premio enantes mentáu, por detrás d’un coru croata y otru italianu.

Pero non too va ser cantar en grandes escenarios. La tradición de los cancios de chigre ye daqué a lo que l’Ochote Llangreanu nun ye ayenu, y les sos participaciones en diversos certames d’esti tipu cunten por ésitos de crítica y públicu, como pue ser el Certame de Cantares de Chigre en Gascona, n’Uviéu, con un primeru y un segundu puestu nes sos dos primeres ediciones.

Ye tamién de destacar que l’Ochote Llangreanu tien el galardón “Faisán de Bronce”, que-y foi concedíu pel Centru Asturianu de Madrid nel añu 2004, en reconocencia a toa un llabor d’espardimientu cultural al traviés de la música coral asturiana.

No que cinca a grabaciones, pueden atopase participaciones en tres trabayos d’amuesa y folclore d’Asturies, asina como dos trabayos propios: “Dende un llugar d’Asturies” y “Cantando…” con una perbona acoyida pola crítica especializada nel Folclore Rexonal. Esti caberu trabayu, onde l’Ochote amesta canción Asturiana, habaneres y obres d’otros llugares del país y del estranxeru, mereció nel mes de Payares el Premiu de la Crítica Asturiana, otorgáu por la Radiotelevisión del Principáu d’Asturies. Un premiu que vieno a facer reconocencia tamién a tola trayectoria d’un cuartu de sieglu nos escenarios.

Porque nel añu 2013 l’Ochote Llangreanu cellebró’l so 25 aniversariu, un cuartu de sieglu nos escenarios. Y apaeció como un finxu na so trayectoria, daqué bien a destacar, la concesión per parte de la Federación de Coros d’Asturies del Premiu “Axuntábense” 2012, galardón pal que l’Ochote tuvo’l placer de sumar sofitos incondicionales de numberoses formaciones corales asturianes, y que vien reconocer una trayectoria llarga y brillante nel mundu musical asturianu.